ՏԻԳՐԱՆ ՈՒՐԻԽԱՆՅԱՆ."Կոճակ սեղմողները" կայացնում են որոշումներ, որոնք ժողովրդի շահերից չեն բխում

Քաղաքական "ռեբրենդինգը" նոր երևույթ չէ մեր քաղաքական իրականության մեջ: Այն թարմության, նոր գաղափարներ և ունիկալ առաջարկներ ներմուծելու հնարավորություն է: Այս իմաստով ԲԱՐՈՄԵՏՐԻ երկխոսությունը Տիգրան Ուրիխանյանի հետ, միանգամայն տեղին էր…

2000թ-ից զբաղվում եք կուսակցական գործունեությամբ: Հայաստանի առաջադիմական կուսակցության հիմադիրն եք եղել, իսկ վերջերս` մայիսի 16-ին հիմնել և ղեկավարում եք "Ալյանս" առաջադիմական ցենտրիստական կուսակցությունը: Ի՞նչն է "առաջադեմ" Ձեր կուսակցության մեջ: Որոնք են  գաղափարաքաղաքական առաջնահերթությունները:

Մոտ երեք շաբաթ քննարկումներ էին գնում կուսակցության անվան հետ կապված: Հանրագումարում մենք եկանք ընդհանուր հայտարարի: "Ալյանս" միավորում, առաջադիմական և ցենտրիստական` դասագրքային և քաղաքական ուղղություն արտահայտող բառակապակցություններ են: Գաղափարախոսությունը ներկայացնելու համար, ես պետք է ձեզ ամբողջ ծրագիրը ներկայացնեմ, որը, գուցե, այլ տեղեկատվական առիթի նյութ է, հաշվի առնելով հարցի շատ մեծ ծավալը:

Բայց, այդուամենայնիվ, գործնականում ի՞նչ կտա մեր հանրությանը Ձեր կուսակցությունը, որ չեն տալիս մյուսները:

Ես չեմ կարող ասել` ինչ կտա, ես կարող եմ ասել` ինչ կվերցնի: Այն ստեղծվել է նվաճելու դաշտը, որը լքել են բազմաթիվ կուսակցություններ: Եթե նրանք չեն գործում ինչպես հարկն է կամ մեր քաղաքացիների կողմից չեն վայելում համապատասխան աջակցություն և վստահություն, դա նշանակում է, որ դաշտը ունի բացեր, հետևաբար, առաջադիմական ցենտրիստական կուսակցությունը հնարավորություն ունի նվաճելու այդ տիրույթը: Եթե այն որոշակի հմտություններ ունեցող, կիրթ, պարկեշտ, պատրաստված մարդկանց շնորհիվ ձեռք բերեց վստահություն, ապա մենք հնարավորություն կունենանք մեր ներկայությունն ապահովելու քաղաքական իշխանության որոշումներ կայացնող օղակներում: Ինչ արդյունք կունենանք այս առումով` ցույց կտա ժամանակը:

Ըստ Ձեզ, ինչի՞ հետևանք է կուսակցությունների հանդեպ վստահության ի սպառ բացակայությունը: Ի՞նչ քայլեր պետք է ձեռնարկել այդ վստահությունը վերականգնելու համար:

Նախևառաջ` խաբեության, անտաղանդության, անարդյունավետության: Ես այն մարդկանցից չեմ, ովքեր առավոտից երեկո մտածում են վստահություն ստեղծելու մասին: Ես աշխատում եմ լավ, և հորդորում ու խնդրում եմ նույնն անել իմ թիմին: Փիարշիկները, չեմ պատկերացնում, որ պետք է աշխատեն, օրինակ, Լեոնարդո Դա Վինչիի "Մադոննա Բենուա"-ի վրա: Այսինքն այն, ինչը որակյալ և արդյունավետ է` շատ արագ վստահություն է գտնում: Իսկ եթե ես միմիայնմտածեմ, որ ինչ-որ բան պետք է անեմ վստահություն ձեռքբերելու համար, ապա դա ինձ կխանգարի իմ գործն արդյունավետ և որակյալ անելու տեսանկյունից:

Վերջերս հիմնադրված "Քաղաքացիական պայմանագիր" կուսակցությանը մրցակից համարու՞մ եք:

Քաղաքացիական պայմանագիրը քաղաքական ուժ է, որը կարող է թարմություն բերել ընդդիմադիր դաշտում: Եթե մենք տարբեր միավորներ ենք, բնական է` մրցակցում ենք, բայց կարող է լինել գործընկերային մրցակցություն և` հակառակը: Ես ողջունում եմ նրանց, ովքեր երկրում առկա խնդիրները վեր են հանում, որովհետև ինչքան էլ թվում է շատ են ընդդիմադիր ուժերը, ժողովրդին հուզող խնդիրները վերհանողները, նրանց շահերը պաշտպանողները քիչ են: "Կոճակ սեղմողները" կայացնում են որոշումներ, որոնք ժողովրդի շահերից չեն բխում: Սա փաստ է, որ պետք է միշտ արձանագրել:

ԱԺ տնտեսական հարցերի մշտական հանձնաժողովի կազմակերպած "Էլեկտրաէներգիայի սակագնի վերանայման հիմնավորվածության վերաբերյալ" թեմայով խորհրդարանական լսումների ժամանակ Դուք Ազգային ժողովի ամբիոնից ելույթը սկսեցիք` ՀԷՑ-ի գլխավոր տնօրեն Եվգենի Բիբինին ուղղված սթափության կոչով: Քանի որ սա բավականին ակտուալ խնդիր է և հետաքրքրում է հասարակության լայն շերտերին` լուծման ի՞նչ տարբերակներ կառաջարկեիք:

Էլեկտրաէներգիայի սակագնի թանկացման շուրջ առաջին իսկ խոսակցությունից սկսած մենք բարձրացրեցինք չարաշահումների, քաղաքացու համար տեսանելի ապօրինությունների, անտրամաբանական երևույթների մասին հարցեր: Երբ ոլորտը համակարգող գերատեսչության ղեկավարը` էներգետիկայի նախարարը, իր հերթին խոսեց գողության և անարդյուանվետ կառավարման մասին, մենք հասկացանք, որ կոպիտ, լկտի, թալան ու կաշառակերություն իրականացնող ՀԷՑ-ի պաշտոնյաների ու նրանց հետ փոխկապակցված պետական պաշտոնյաների դեմն առնելու տարբերակը մեղավորներին քրեորեն պատժելն է: Արտասահմանյան կազմակերպությանը ընձեռվել է բացարձակ մենաշնորհային գործունեություն իրականացնելու հնարավորություն, մեղմ ասած, անփութության և թողտվության պայմաններում: Ինչու պետք է անարդյունավետ կառավարման և գողության արդյունքում` քաղաքացին վճարի: Մենք կողմնակից ենք ՀԷՑ-ի, եթե ոչ ամբողջական, ապա, գոնե մասնակի պետականացմանը: Շատ պարզ շուկայի օրենք է` եթե մի ծառայություն մատուցվում է մեկ կազմակերպության կողմից, ապա այն լինելու է թանկ և անորակ, եթե ծառայությունը մատուցվում է մեկից ավելի կազամակերպությունների կողմից, ապա բնական է, որ առաջանալու է մրցակցություն: Հիմա ես ուզում եմ հասականալ, միթե պետությունը չի կարող պետականացնել ՀԷՑ-ը, ցածր սակագնով որակյալ ծառայություններ մատուցել: Վստահ եմ, որ կարող է, դրա համար, նախևառաջ, անհրաժեշտ է քաղաքական կամք, տարրական գիտելիքներ, հմտություններ ու ամենակարևորը` ցանկություն:

Գագիկ Ծառուկյանի ԲՀԿ նախագահի պաշտոնը թողնելուց և, առհասարակ, քաղաքականությունից հեռանալուց հետո շատերը լքեցին կուսակցության շարքերը: Դուք լինելով ԱԺ-ում այս խմբակցության առանցքային դեմքերից մեկը` ինչպե՞ս եք արձագանքել ձեր գործընկերների նման պահվածքին:

"Բարգավաճ Հայաստան" կուսակցության հետ տեղի ունեցած փոփոխությունները պայմանավոված են մի շարք հանգամանքներով, և ոչ միայն Գագիկ Ծառուկյանի քաղաքականությունից հեռանալու հետ: Դրանց մասին շատ է խոսվել: Ես պարզապես ուզում եմ հիշեցնել մեկ բան, դուք այս հարցը տալիս եք մի անձի, որը ԲՀԿ-ում մնացել է մինչև վերջ, մի բան էլ ավելի: Նախևառաջ, ինձ համար պետք է ցավալի լինի, հետևաբար, առաջարկում եմ այն շրջանցել և այսքանով եզրափակել:

 

ԲԱՐՈՄԵՏՐ

15:00 Հունիս 18, 2015

Ամենաընթերցված նյութեր